Dvergsins andligi þroski, ellegar misþyrmingar genginna hrossa.

Introitus

Eitt sinn sagði vitur maður að ekki þýddi að berja dauðan hest. Dvergurinn er ekki vitur maður.

Oxymap

Dvergur hefur áður lýst því yfir að hann starfi við vísindarannsóknir innan vébanda hins háærugverða Oxymap. Á haustmánuðum komst rannsóknarhópurinn í nýtt húsnæði við Hamrahlíð og vinnur Dvergur nú við hlið verkfræðinga jafnt sem lífvísindamanna. Þótt upphaflegur tilgangurinn með sameiningu verkfræði- og lífvísindahluta hópsins hafi verið að auðvelda samskipti milli starfsmanna hefur sameiningin haft ákveðnar aukaverkanir.

Í ljós hefur komið að andlegur þroski verkfræðinga er að jafnaði ekki meiri en Dvergsins og hafa því tilraunir hans til að draga móralinn innan fyrirtækisins niður
í svaðið tekist með miklum ágætum. Þannig má sérhver starfsmanna Oxymap búast við því að vera líkt við óæðri prímata og/eða hryggleysingja að minnsta kosti nokkrum sinnum á dag, auk þess sem óráðlegt telst að skilja tölvu sína eftir ólæsta í meira en hálfa mínútu. Þar sem Dvergurinn gerðist sekur um þau mistök nú um hádegisbilið og hefur ekki enn fundið út hvað gert var við tölvu hans er óvíst að þessi færsla muni skila sér óbrengluð á vefinn.

Á þeim stuttu stundum og fátíðu sem Dvergur og samstarfsfélagar hans láta af almennum leiðindum og ónotum í garð hvers annars virðist þó sem nokkuð nái að vinnast af þeim verkefnum sem hópurinn setur sér.

Dvergurinn er í það minnsta við það að ljúka þeirri rannsókn sem hann var ráðinn til að vinna. Rannsóknin snérist um blóðþurrðarsjúkdóma í augum og áhrif mismunandi lyfjameðferða á mælanleg áhrif þeirra. Niðurstöður rannsóknarinnar benda til þess að enginn munur sé á meðferðarhópunum og því engin áhrif af viðbættu próflyfinu. Niðurstöðurnar eru með öðrum orðum neikvæðar.

Ekki er laust við að hugtakið "Déjà vu" komi upp í huga Dvergs.

Sá á kvölina...

Dvergur stendur nú frammi fyrir vandamáli og það stóru. Vandamál þetta hrjáir að jafnaði um 0,7 ppm jarðarbúa og felst í því að þurfa að ákveða hvað hann ætlar að gera þegar hann verður stór. Dvergur þarf með öðrum orðum að finna sér doktorsverkefni við hæfi. Nú kann að vera að einhverjir vorkenni Dvergi það lítið og óski honum það heitast að hann fái að kynnast raunverulegum vandamálum og er ekki örgrannt um að Dvergur geti skilið þau sjónarmið.

Engu síður er hér um raunverulegt vandamál að ræða. Á Dvergur að einbeita sér að rottusjónhimnublóðþurrðarrannsóknarvinnu ellegar mannasjónhimnuæðasúrefnismettunarmælingum útfrá ljósgleypnimælingum á stafrænum myndum , líkt og hann hefir stundað uppá síðkastið? Ætti hann að gefast sönglistinni allra sinna krafta?
Má vera að hamingjuna sé að finna í ævistarfi við sítrusávaxtalitun, kjúklingakyngreiningu eða fnykmat?
Spyr sá sem ekki veit.


Að málsgrein þessari ritaðri kemur Dvergi til hugar að hann hefir enn ekkert ritað hér á síður um þann starfa er hann vinnur að þessi misserin. Starfinn sá er, merkilegt nokk, annar en hann var ráðinn til á vormánuðum. Lengi vel stóð til að Dvergur myndi vinna við tilraunir á nýju formi augnlyfjagjafa. Tilraunir þessar hafðu verið framkvæmdar á litlum sætum kanínum. Í ljós kom að engin aðstaða virðist vera til í íslensku háskólasamfálagi til slíkra rannsókna og fengu því kanínurnar að sleppa í bili.

Í staðinn hefur Dvergurinn unnið að rannsóknum og hugbúnaðaprófun fyrir hið víðþekkta og margfræga fyrirtæki Oxymap ehf. Ber hann hið virðulega starfsheiti "Verkefnastjóri" og flaggar því við hvert tækifæri, sem eðlilegt er. Kort sagt, ganga flestir vinnudaga Dvergs út á að sitja við tölvuskjá og smella með músinni á marglitar myndir. Mikil er sú verkefnastjórnun.

Dvergsins fótó-magasín

Dvergurinn hefur opnað fótómagasín. Ólíkt bloggsíðu sinni hefur Dvergurinn afsökun fyrir því að vanrækja þessa síðu. Borðtölva hans, sú er geymir flestar hans mynda, hefur lengi verið óvirk.

Meistari Dvergur

Síðastliðinn fimmtudagur var allmikill í Dvergsins bíógrafíu. Voru þá verk hans síðastliðinna tveggja ára tekin til dóms, að undangenginni presentasjón hans téðra verka. Valdir voru til dómsins tveir af landsins helstu sérfræðingum, hverjir spurðu Dverg í þaula um allt er varðar virkni kælingar og gammaaínósmjörsýrusamverkandi lyfja á rottusjónhimnublóðþurrðartaugungaskaða.

Skemmst er frá að segjast að sérfræðingarnir komu ekki að kofanum tómum og var Dvergi því ekki varpað í dýflissu hefnigjarna rotta. Er það vel.

Ber Dvergur nú lærdómstitilinn Magister Scientarium og hyggst hann að sjálfsögðu flagga honum við hvert tækifæri. Hefur Dvergur í þessu sambandi látið útbúa nafnspjöld (stærð A2) á hverjum lærdómstitillinn er skýrt og greinilega prentaður, auk þess titillinn verður skráður í símaskrá og á dyrabjöllu.

Einnig stendur til að ráða mann til þess að hlaupa 10 skrefum á undan Dvergi hvert sem hann fer til að breiða rauðan dregill fyrir fætur honum. Ráðning hefur þó um nokkuð tafist þar sem fáir vilja láta sér ánægjuna að lúta fyrir fótum Dvergsins nægja og heimta peningagreiðslu fyrir verk sín. Mun sú ólundarillmenska og fégræðgi auðvitað ekki liðin.

Dvergur tuðar

Dvergur er nýkominn frá Vesturheimi, hvar hann kynnti verk sín á ráðstefnu gífurvaxinni í Látradalsvirki í Florida og slæptist um götur Nýju Orléans í Loðvíksríki. Fjarri er það þó að Dvergur hyggist rita ferðasögu sína. Ferðasögur hættu að verða áhugaverðar um leið og sauðsvartur pupullinn fór að geta hafa efni á því að yfirgefa Frón oftar en einu sinni á ævinni. Þess í stað mun Dvergurinn kvarta eins og honum er lagið.

Efst á lista þeirra fyrirbæra sem Dvergur myndi þessa stundina vilja kasta á glæ er sú óhræsiseymdarördeyðuafsökun fyrir flugfélag sem Flugleiðir eru. Flugleiðir mun vera eina flugfélagið í hinum siðmenntaða heimi sem kappkostar að bjóða uppá fullkomna lággjaldaflugfélagsþjónustu á verði snýtiþjónustuflugfélags. Eins og hin snoppufríða Þórunn Lárusdóttir er svo vinsamleg að tilkynna manni 150 desibelum í 40 mínútna kynningarmyndbandi um borð í vélunum þá hefst "Flugleiðareynslan" um leið og maður pantar miðann. Á útlitsfagurri vefsíðu fyrirtækisins gefst manni kostur á að kaupa miða á sérstöku afsláttarverði sem þýðir að miði frá Íslandi til N-Ameríku er einungis tvöfalt dýrari en flug frá N-Ameríku til meginlands Evrópu með sama flugfélagi. Um borð í vélunum er mannleg nálægð höfð í fyrirrúmi og hverjum og einum úthlutað plássi fyrir rasskinn að eigin vali, ásamt fótaplássi sem dugar flestum undir einum og fjörutíu á hæð.
Þó er eins og djúpum skilningi flugfélagsins á þörfum mannvera (H. Sapiens) bregði aðeins er kemur að málsverði. Ekki virðist vera gert ráð fyrir að þeir einstaklingar sem matast um borð í vélunum hafi hliðlæga framlimi eins og áðurnefnd tegund - eða að minnsta kosti ekki að þeir séu notaðir við neyslu matarins, þar sem ekki pláss til þess. Þar að auki virðist ekki vera gert ráð fyrir að þeir einstaklingar sem neyta matarins (væntanlega með munnlimum eða kviðlægum framlimum) hafi bragð- eða lyktarskyn sem dugar til að greina milli matarskammtsins og plastbakkans sem umlykur hann.

Eins og flest önnur flugfélög bjóða Flugleiðir upp á skemmtidagskrá til að stytta flugfarþegum stundir á leiðinni. Skýrum og björtum skjám á stærð við meðal krítarkort er haganlega komið fyrir með fjórtán sætaraða millibili og birta þeir manni skemmtiefnið. Dagskrá þessari virðist þó vera beint að fremur þröngum undirhópi masókískra Alzheimer-sjúklinga, þar sem hlutfall þeirra sem a) hafa ekki séð sérhvern þeirra þátta og kvikmynda sem boðið er uppá áður í Ríkissjónvarpinu eða fjórtándu endursýningu Skjás 1 og b) hafa nokkurn einasta áhuga á að sjá viðkomandi efni þó svo sé, er tölfræðilega ómarktækt meðal heilbrigðra einstaklinga. Frásagnir eru til af leiðinlegra sjónvarpsefni, en ekki frá áreiðanlegum vitnum.

Til að neita ekki þeim fáu sem áhuga hafa á sjónvarpsefninu um pirring á leiðinni tilkynnir flugstjóri stefnu- og hæðarbreytingar með fimm mínútna millibili, ásamt nákvæmum lýsingum á veðurskilyrðum í lofti, láði og legi í Keflavík, Kulusuk og Azureyjym, óháð áfangastað flugsins. Þær fáu mínútur sem flugstjórinn tekur sér málhvíld notar yfirflugfreyjan jafnan til að kynna notkun sætisbelta fyrir farþegum á íslensku og ráðherraensku, ásamt hrollvekjandi tilraunar til riftunar stjórnmálasambands Íslendinga og Dana.

Við þetta bætist svo sú óútskýrða árátta flugfélagsins að gubba farþegum sínum út úr vélinni árla morguns á hinum jafnan hrollkalda Fróni, til að tryggja að í það minnsta einn heill vinnudagur sé ónýtur að ferð lokinni.

Dvergur vonar frá innstu hjartarótum að sá dagur komi að önnur flugfélög taki að fljúga milli Íslands og N-Ameríku svo hægt verði að skipta við siðmenntað fyritæki og fyrir fullt og allt segja Flugleiðum að troða sinni æslanderexperiens sem lengst upp í ósmurt orgelið og loka því kyrfilega á eftir.

Hafi nokkuð annað verið á kvörtunarlista Dvergsins er það gleymt í bili. Flugleiðinn einn er nóg að sinni.

Af gefnu tilefni

...vill Dvergurinn taka fram að hann ætlaði sér aldrei að fara í bæinn í kvöld.

Af blóðþurrðarinnar breytileika

Hér með tilkynnist firrðum og fljóðum að gamma-amínó-smjörsýrusamverkandi lyf gagnast ekki til verndunar taugavefs sjónhimnu við blóðþurrð og endurflæði. Lesendur eru beðnir að ígrunda þessa staðreynd vel.

Þessum stórfréttum samhliða ber að tilkynna að Dvergurinn sér nú fljótlega fram á að geta stundað eðlilegt líferni níutilfimmvinnu og almenns ólifnaðar um helgar eftir að hafa setið við skriftir um alllangt skeið. Mun það varla grátið.

Ritverkinu mikla var skilað fyrr í dag, en að sex vikum liðnum mun Dvergnum gert að standa fyrir máli sínu frammi fyrir dómnefnd. Dómnefnd sú er skipuð landsins helstu fræðingum á sviði GABAergrar rottusjónhimnublóðþurrðartaugaverndar og hafa þeir nú tíma sem nemur sumarfríi verkamanns til að semja hverjar hinar kvikindislegustu spurningar um efnið sem mögulegar eru.

Undir lok maímánaðar komanda mun svo stóri dómur upp kveðinn. Dvergur skal þá treysta á sitt eigið hyggjuvit og þau fræði sem honum hefur tekist að berja sér í koll til að bjarga eigin skinni. Hefur Dvergur fyrir satt að ef honum mistekst að svara þó ekki sé nema einni af þeim spurningum sem lagðar eru fyrir hann, þá muni honum verða varpað í dýflissu fulla af eineygðum, hefnigjörnum rottum.

Vangaveltur heimspekilegar

Er það nördalegt að;
a) eiga þrjár mismunandi upptökur af Töfraflautunni og
b) syngja O Isis uns Osiris í sturtu?

Af höfuðtólum vönduðum

Ekki alls fyrir löngu ákvað Dvergur að festa kaup á vönduðum höfuðtólum þar er hann hafði fengið nóg af samanlímdum hjáróma Philips tólum þeim sem hann asnaðist til að kaupa fyrir nokkrum árum, haldandi að þar væri um gæðaframleiðslu að ræða.

Dvergurinn lagðist því í hefðbundna netleitarmaníu þar sem allra tóla sem fáanleg eru á Skerinu var leitað á erlendum vefsíðum til að lesa um þau dóma. Komst Dvergurinn fljótlega að þeirri niðurstöðu að einu nothæfu tólin kæmu úr smiðju Sennheiser og tók þá ekki nema örfáar klukkustundir að ákveða nákvæmlega hvaða höfuðtól skyldu keypt.

Þegar hér var komið sögu hafði netnjósnadeild Samtaka verslunar og þjónustu komist á snoðir um fyrirhuguð kaup Dvergsins og reiknideild keyrði þegar reiknilíkan sitt í gegnum Jötun, tölvuþyrpingu Háskólans (að hvurri þeir hafa ótakmarkaðan aðgang) til þess að spá fyrir um líkleg kaup Dvergsins. Að því loknu var boðum komið til lagerhreinsunardeildar samtakanna sem gerði viðeigandi ráðstafanir.

Síðar þennan sama dag kom í ljós að starf samtakanna hafði borið árangur, þegar Dvergnum var tjáð í versluninni Pfaff að vara sú sem hann óskaði væri uppseld. Þetta kvöld fengu starfsmenn njósna-, líkindareikninga- og lagerhreinsunardeilda SVÞ viðurkenningu og sérstaka launauppbót fyrir velheppnað starf í gegnum tíðina, enda hafði enn og aftur tekist að koma í veg fyrir að Dvergurinn gæti keypt þá vöru sem hann óskaði.

Við tók önnur (og mun styttri) netleit sem endaði með kaupum á tólum frá öðrum þýskum hágæðaframleiðanda, því víðþekkta fyrirtæki Beyerdynamic. Höfuðtólin þau eru af gerð DJX-1, lokuð og vega vart meira en fimmtán kílógrömm sem gerir langvarandi notkun þeirra umtalsvert þægilegri en ef við hvort eyra væri bundinn lampamagnari og sviðshátalari.

Þótt vigt þessara tóla hafi með nýjustu tækni verið haldið vel undir fallþunga meðal Strandalambs verður ekki annað sagt en að hljómur þeirra er hreint afbragð. Hafa þau þannig haft meiri áhrif en Dverginn hafði órað fyrir, en með þeim má heyra veikleika á flestum þeim hljómflutningstækjum sem þau eru tengd við. Einnig hafa upp lokist fyrir Dvergi mörg leyndarmál varðandi þá tónlist sem hann á stundum hlýðir á. Hafði hann til dæmis ekki tekið eftir því áður að þessi upptaka píanóverks er merkileg fyrir fleiri sakir en undursamlegan hljóðfæraleikinn.

Lesendum er gefið eftir að geta í hverju merkilegheitin eru fólgin.

Viðbót:
Dvergur hefur grennslast frekar fyrir um upptökuna og veit nú að merkilegheit hennar eru ekkert merkileg ef haft er í huga hver píanóleikarinn er.

Hlekkir nýjir

Samfara þeirri endurreisn sem Dvergur reynir nú að framkvæma á netsölum sínum býður hann vinum öldnum og nýjum til sætis í öndvegi sínu, eins og vera ber.

Fylgir hann þar tveimur reglum; annars vegar að Dvergurinn hafi nógu nýlega rætt við viðkomandi að hann viti hvar í heiminum hann er staddur og hins vegar að viðkomandi hafi fært hið minnsta eina færslu á sitt vefrit á yfirstandandi ári.

Eins og gefur að skilja mun Dvergur eflaust hafa gleymt mörgum verðugum og eru því ábendingar vel þegnar.

Kastljós nær nýjum lægðum

Skyldi einhver í gegnum tíðina hafa prísað sig sælan gegnum þverhandar háa gæsahúðina og alkula kjánahroll af völdum Kastljóss, að að minnsta kosti séu viðmælendur þess færir um gang og talræn samskipti, er sá hinn sami beðinn að berja þetta myndskeið augum.

Dvergur hinn síbloggandi

Dvergur veit vel hvað sífelld bloggskrif hans geta verið pirrandi. Meðalmaður á vissulega erfitt með að fylgjast með öllum þeim færslum sem Dvergurinn skrifar hér inn, en vonandi fyrirgefst honum þessi ánauð lesenda.

Dvergurinn getur hreinlega ekki orða bundist. Hann hefir nú lokið við tilraunir sínar og sent sína síðustu rottu yfir holræsamóðuna miklu, í bili að minnsta kosti. Þykir honum það ógott lítið. Setur einsemdar í myrkvuðum kjallarakompum yfir sofandi rottum, hverra líf endar á voveiflegan hátt hefur einfaldlega sett verulegt álag á Dvergsins sálartetur og lái honum hver sem vill. Það fylgdi því af þessum sökum mikill léttir þegar Dvergurinn tók sig til um daginn og pakkaði rannsóknartækjum niður í kassa til flutninga aftur upp á Læknagarð.

Aldrei aftur mun Dvergurinn taka þátt í slíku. Aldrei aftur rannsóknavinna í myrkri. Aldrei aftur aflífun saklausra nagdýra.

Dvergurinn hefur ekki hingað til verið þekktur fyrir að standa við sín prinsipp.

Tæknin voldug

Lífeðlisfræðistofnunnar helsta þing er kaffimaskíma mikil og máttug. Þessi máttarstólpi íslenska físíólógíurannsókna fer létt með að laða fram hin ólíkustu afbrigði svartbaunaseyðis, allt frá telita uppáhellingi þeim sem vesturheimskir drekka úr skúringafötum sínum, til ítalsks munkamalbiks.

Ekki er þó laust við að vél þessi hafi ofmetnast vegna þess lofs sem hún er jafnan ausinn og telur hún það ekki eftir sér að neita kaffiþurfi um sopann ef henni hugnast ekki kaffimálið sem fyrir hana er lagt. Oflæti er ekki heldur hennar eini löstur, þar ofskynjanir virðast á stundum hrjá hana í brjálsemi hennar.

Fyrr í dag hugðist Dvergurinn brynna sér ákafan kaffiþorstann, enda var nær heil klukkustund liðin síðan hann hafði síðast fengið kaffi. Bar þá svo við að kaffivélin kvartaði undan vatnsskorti. Það kann að hljóma sem hinn eðlilegasti hlutur að vatnsgeymir kaffivélar tæmist, en hafa ber í huga að þessi vél er beintengd Gvendarbrunnum.

Eftir augnabliks umhugsun komst Dvergur að þeirri niðurstöðu að meira að segja kaffineysla hans væri ólíkleg til þess að geta ausið brunna Guðmundar góða þurra. Var því sökinni skellt á vélina og hennar hugarfar leiðrétt á þann hátt sem jafnan gefst vel með tölvubúnað - með endurræsingu.

Dvergur hefur síðan hugleitt hvert heimur vor stefnir þegar endurræsa þarf kaffivélar vegna villuboða.